Përflitej për një shkarkim të Emmanuel Egbo nga stoli i Tiranës dhe ashtu ka ndodhur. Humbja e sotme 0-1 përballë Korabit dhe eliminimi nga Kupa e Shqipërisë, ka qëlluar fatal për trajnerin nigerian. 47-vjeçari mori drejtimin e klubit më të titulluar të futbollit shqiptar dhjetorin e vitit të kaluar dhe ia doli të dërgonte ekipin te titulli kampion sezonin e kaluar. Klubi i Tiranës, me anë të një postimi në faqen zyrtare, ka lajmëruar shkarkimin e Egbo. “Klubi i Futbollit Tirana njofton shkarkimin e trajnerit Emmanuel Egbo. Pas ecurisë jo të mirë të skuadrës në ndeshjet e fundit, Egbo nuk do të jetë më në krye të bardhebluve për shkak të rezultateve të munguara.
Klubi e falënderon për përkushtimin dhe sukseset e arritura, të cilat kulmuan me kthimin e titullit kampion në shtëpi. Duke i uruar suksese në karrierën e tij, kampi i kampionëve i jep një meritë të veçantë të suksesit në sezonin e shkuar njeriut që prej vitesh ishte edhe do të jetë pjesë e familjes së bardhebluve. Faleminderit Egbo!”, lexohet në postimin e Tiranës.
