Erling Haland ka treguar se çdo investim që ka bërë Borusia Dortmund për të, është mëse i justifikuar. Talenti 19-vjeçar i cili shkëlqeu me RB Salcburg, ka lënë shenjë që në ndeshjen e tij të parë zyrtare me skuadrën gjermane, duke e ndihmuar këtë të fundit që të fitonte një ndeshje të pabesueshme 5-3 ndaj Augsburg.
Në minutën e 55-të të sfidës, ndeshja ishte 3-1 për Augsburg që po krijonte raste e dominonte, atëherë trajneri Favre vendosi të hidhte në fushë norvegjezin që e kishte nisur takimin nga stoli dhe atij iu deshën vetëm tri minuta për të shënuar golin e tij të parë në Bundesligë. Sanço në minutën e 61-të barazoi sfidën, ndërsa në minutat 70-të dhe 79-të ishte Haland që goditi përsëri ,duke debutuar me tregolësh dhe duke i dhënë një sukses të jashtëzakonshëm ekipit të Borusia Dortmund.
E të mendosh se trajneri Favre kishte menduar fillimisht që të mos i jepte minuta lojtarit. “Është në rrugën e duhur por nuk di të them nëse do të luajë”, tha ai para sfidës. Për fatin e mirë të Borusias, trajneri ndryshoi mendje dhe të gjithë patën mundësinë të shihnin debutimin spektakolar të këtij të riu që po bën gjithë botën të flasë për të.
