Detaje të reja janë zbuluar nga divorci i çiftit të famshëm hollivuduan, Kim Kardashian dhe Kanye West. Mediat e huaja kanë publikuar dokumentet e gjykatës, të cilat zbulojnë se Kardashian përmendi “ndryshimet e papajtueshme” si arsyen e ndarjes së tyre.
Dokumentet zbuluan gjithashtu se data e ndarjes së tyre është ende për t’u diskutuar, siç u raportua më parë, pasi çifti i famshëm kishte një marrëveshje para martese. Javën e kaluar u zbulua se ylli televiziv po kërkon gjithashtu kujdestari të përbashkët dhe ligjore të katër fëmijëve që ndan me reperin.
“Ndarja është miqësore dhe nuk ka asnjë dramë,” tha një burim pranë tyre për Daily Mail. Reperi dhe Kardashian nisën lidhjen e tyre në 2012 dhe konfirmuan marrëdhënien duke u shfaqur në ngjarje publike së bashku. Ata u martuan më 24 maj të vitit 2014, në një ceremoni madhështore të mbajtur në Firence të Italisë.
