Pas rreth 5 muajsh është bërë i mundur arrestimi i një të riu në Konispol. Ky i fundit, 36 vjeç, sipas policisë akuzohet për prodhim e shitje narkotikësh dhe i është caktuar masa e arrestit me burg.
“Vijon operacioni policor kombëtar i koduar “Sundimi i ligjit” që ka si qëllim kapjen e shtetasve të shpallur në kërkim dhe të atyre që posedojnë armë zjarri, pa leje. Kapet dhe vihet në pranga një 36-vjeçar i shpallur, i akuzuar në kërkim për veprimtari kriminale në fushën e narkotikëve.
Si rezultat i kontrolleve të mbështetura te informacionet e siguruara nga inteligjenca policore dhe të kryera në vijim të operacionit policor kombëtar të koduar “Sundimi i ligjit”, shërbimet e Komisariatit të Policisë Sarandë kapën dhe ndaluan shtetasin e shpallur në kërkim:
V. B., 36 vjeç, banues në Shëndëlli, Konispol. Gjykata e Shkallës së Parë e Juridiksionit të Përgjithshëm Sarandë i ka caktuar këtij shtetasi, masën e sigurisë “Arrest në burg”, për veprën penale “Prodhimi dhe shitja e narkotikëve”, pasi në muajin korrik të vitit 2022, në banesën e tij, është gjetur një sasi lënde e dyshuar narkotike kanabis. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme“, thuhet në njoftimin zyrtar të bluve.
