IKMT ka vijuar në zonën e Rradhimës në Vlorë, ndërhyrjen për prishjen e objekteve të parashikuara për tu shembur, në kuadër të projektit të rehabilitimit të zonës. Aksioni i nisur prej fillimit të muajit shtator, parashikon shembjen e rreth 60 objekteve deri në afërsi të Orikumit, ndërsa janë objekte të vendosura kryesisht në afërsi të bregut të detit. Aksioni ka vijuar këtë të premte, ndërsa është ndjekur dhe nga kreu i IKMT Dallendyshe Bici.
Ndërkohë në zonë nuk kanë munguar dhe dhjetëra përfaqësues të bizneseve, të cilat shtrihen përgjatë vijës bregdetare të Rradhimës dhe Orikumit. Këta të fundit jashtë kamerave kane pranuar se nuk janë kundër projektit të rehabilitimit të zones, por kërkojnë të njihen fillimisht me projektin.
Ne fillim të muajit shtator, IKMT nisi aksionin për prishjen e ndërtimeve në bregdet, duke nisur në zonën e ujit të ftohtë, aty ku fillimisht është parashikuar projekti i Lungomare 2, që do të shtrihet nga uji i ftohte deri ne afërsi te tunelit në Vlorë.
