Inflacioni pësoi sërish një rënie të lehtë në muajin gusht dhe ra në 1.4%, nga 1.5% që kishte qenë për korrikun. Shifrat e Instat tregojnë se inflacioni është ndjeshëm më i ulët krahasuar me vitin e kaluar dhe larg objektivit prej 3% të Bankës së Shqipërisë. Rënia e muajit gusht u përcaktua sidomos nga grupi me peshën kryesore, ai i produkteve ushqimore. Inflacioni i këtij grupi ra në 2.4%, nga 2.8% që ishte muajin e kaluar. Rritja e çmimeve të frutave dhe produkteve të bulmetit u kompensua nga një ulje e ndjeshme e inflacionit për nëngrupin e perimeve. Rritje domethënëse të inflacionit për gushtin shënuan grupet “transporti” dhe “argëtim e kulturë”
Niveli i ulët i inflacionit po e vendos Bankën e Shqipërisë para dilemës për të reaguar ose jo me një ulje të mëtejshme të normës bazë të interesit. Banka Qendrore kishte arritur në konkluzionin se inflacioni i ulët në gjysmën e parë të vitit i detyrohej kryesisht mbiçmimit të lekut në kursin e këmbimit me euron. Parashikohej që ky efekt të dobësohej gradualisht në gjysmën e dytë të vitit, por, të paktën deri në gusht, një gjë e tillë nuk ka ndodhur. Mbështetur në projeksionin e fundit, Banka e Shqipërisë pret që inflacioni të kthehet në objektiv në gjysmën e dytë të vitit 2021.
Guvernatori Sejko u shpreh pas mbledhjes së Këshillit Mbikëqyrës së datës 7 gusht se rritja e pasigurive në ambientin e brendshëm e të jashtëm ekonomik, mund të bëjnë të nevojshëm një lehtësim të mëtejshëm të qëndrimit të politikës monetare në të ardhmen. Këshilli Mbikëqyrës konstatoi se këto rreziqe janë shtuar në numër dhe janë rritur në probabilitet. Rënia e inflacionit e bën edhe më të mundshëm një lehtësim të mëtejshëm të politikës monetare, duke filluar nga mbledhja e ardhshme e Këshillit Mbikëqyrës, që do të mbahet më datë 2 tetor./ SCAN
