Bashkëshortja dhe njëri prej fëmijëve të ish-gjyqtarit Alaudin Malaj kanë kërkuar urdhër-mbrojtje në gjykatë. Edlira Malaj dhe njëri prej djemve, Alteo, kanë depozituar një kërkesë pranë Gjykatës së Shkallës së Parë në Tiranë dy ditët e fundit. Padia e zonjës Malaj është bërë më 22 gusht, ndërsa padia e djalit është bërë një ditë më vonë, më 23 gusht.
Gjyqtari i Apelit, Alaudin Malaj, me eksperiencë prej gati tre dekadash në sistemin gjyqësor dha dorëheqjen në një letër dërguar Këshillit të Lartë Gjyqësor gjatë muajit korrik të këtij viti, duke hequr në këtë mënyrë dorë nga titulli i magjistratit dhe nga mundësia për t’u rikthyer në sistemin e drejtësisë për së paku 15 vjet. Malaj nuk ishte përfshirë ende në procesin e vettingut.
