Itali/ Humb jetën në vendin e punës 20-vjeçari shqiptar, u shtyp nga ruli asfaltues
Një 20-vjeçar shqiptar, Rogert Ajdini, ka humbur jetën tragjikisht në një aksident në vendin e punës në Valtopina të Italisë.
I riu, banues në Trevi, ishte duke punuar për asfaltimin e rrugës Santa Cristina, kur dyshohet se u shtyp nga rulit asfaltues që po drejtonte. Sipas mediave italiane, mjeti dyshohet se u përmbys për shkaqe që ende nuk janë bërë të ditura.
Kolegët e tij njoftuan menjëherë shërbimet e emergjencës. Në vendngjarje mbërritën ambulanca, zjarrfikësit dhe helikopteri i shpëtimit, por plagët e marra rezultuan fatale dhe 20-vjeçari nuk mundi të mbijetonte.
Ndërkohë, karabinierët kanë nisur hetimet për të zbardhur rrethanat e aksidentit dhe për të përcaktuar shkaqet e përmbysjes së mjetit.
Punimet për përmirësimin e infrastrukturës rrugore ishin ndërmarrë nga Bashkia e Valtopinës dhe i ishin besuar një kompanie të specializuar.
Ngjarja ka tronditur komunitetin lokal. Kryetari i Bashkisë së Valtopinës, Gabriele Coccia, ka shprehur ngushëllimet për familjen e të riut, duke e cilësuar humbjen si një tragjedi të rëndë.
Shtatë punëtorë të vdekur në tre ditë
Vdekja e të riut shqiptar vjen në një periudhë kur Italia po përballet me disa aksidente fatale në vendet e punës. Sipas raportimeve të mediave italiane, brenda tri ditësh, shtatë punëtorë kanë humbur jetën në rrethana të tilla.
Përfaqësues të institucioneve italiane kanë ngritur shqetësimin për sigurinë në punë, duke kërkuar masa për të parandaluar tragjedi të tilla.
Hetimet për aksidentin në Valtopina vijojnë për të përcaktuar shkaqet e sakta të ngjarjes që i mori jetën 20-vjeçarit shqiptar.
