Drejtoria e Përgjithshme Detare ka bërë sot një njoftim të rëndësishëm për udhëtarët që lëvizin me tragetet e linjës Durrës-Bari dhe anasjelltas, Ditën e sotme në portin e Barit janë krijuar radhë të mëdha të mjeteve të rënda të detyruara të parkojnë në hapësirën e portit për shkak të situatës meteorologjike në të gjithë Italinë. Nga dita e djeshme Prefektura e Barit ka nxjerrë një urdhërese me anën të së cilës bllokohet lëvizja e mjeteve të renda në territorin e prefekturës dhe për rrjedhojë edhe në hapësirën portuale.
Sipas Drejtorisë së Përgjithshme Detare kjo urdhëresë lëshohet për të lehtësuar lëvizjen në rrugët e brendshme dhe të rrugëve ndërqytetëse e autostradave që për shkak të kushteve të jashtëzakonshme të motit kanë rezultuar me probleme të kalueshmërisë. Ditën e sotme Konsulli i Përgjithshëm Adrian Haskaj dhe Oficeri i Kontaktit i Policisë së Shtetit në Bari Kryekomisar Dr. Artur Beu janë takuar me përfaqësues të Policisë italiane dhe të prefekturës së Barit dhe kanë konstatuar se situata është në zgjidhje e sipër, sepse ka filluar lëvizja e mjeteve të rënda nga hapësira e portit dhe së shpejti pritet edhe anulimi i urdhëresës së Prefekturës së Barit për bllokimin e lëvizjes së tyre.
“Për momentin njoftojmë, se nuk ka probleme për tragetet e linjës Bari-Durrës dhe anasjelltas për imbarkimin e mjeteve të rënda dhe të automjeteve familjare. Për çdo problematike mbetemi në dispozicion dhe të gatshëm për zgjidhjen e tyre”, njofton Drejtoria e Përgjithshme Detare.
