Itali, Rezultuan 14 761 teste pozitive me COVID-19, në krahasim me dje që ishin 16 232, sipas të dhënave nga Ministria e Shëndetësisë. Gjithashtu, u regjistruan edhe 342 viktima të tjera ditore. Shkalla e pozitivitetit është rritur me 0,3% duke shkuar në 4,7% (4,4% dje).
“Epidemia po zvogëlohet në shumë rajone, përveç në disa. Incidenca e llogaritur është e barabartë me 159 kundrejt 182 javës së kaluar, që është mbi 50 raste për 100 mijë banorë”, tha presidenti i Institutit të Lartë të Shëndetësisë (ISS), Silvio Brusaferro, gjatë një konference për shtyp.
Sipas ISS, shtrimet në spitale, në pavijone dhe kujdesi intensiv, po zvogëlohen.
Pas më shumë se një muaji, shtrimet në spital në kujdesin intensiv për Covid në Itali kthehen për herë të parë nën 3 000, me 2 979 pacientë në reanimacion, 42 njësi më pak krahasuar me dje në bilancin ditor midis hyrjeve dhe daljeve. Nga ana tjetër, 21 440 persona janë të shtruar në spitale në pavijone të zakonshme, një rënie prej 654 njësish e krahasuar me dje.
