Tetori është muaji i ndërgjegjësimit për kancerin e gjirit, i njohur në mbarë botën si “Tetori Rozë”. Gjatë këtij muaji zhvillohen fushata sensibilizuese për të informuar dhe edukuar qytetarët mbi sëmundjen, shenjat dhe simptomat e saj, si dhe rëndësinë e diagnostikimit të hershëm.
Fushata e ndërgjegjësimit për kancerin e gjirit nisi në vitin 1985 si një aktivitet njëjavor dhe me kalimin e viteve u shndërrua në një fushatë mbarëbotërore gjatë gjithë muajit tetor.
Ngjyra rozë dhe fjongoja rozë janë kthyer në simbole të kësaj fushate, duke përcjellë mesazhin për më shumë ndërgjegjësim, kontrolle periodike dhe diagnostikim në kohë.
Sipas Organizatës Botërore të Shëndetësisë, rreth 2.3 milionë gra preken çdo vit nga kanceri i gjirit në mbarë botën. Diagnostikimi në fazat e hershme rrit ndjeshëm mundësitë për trajtim të suksesshëm, ndërsa në vendet me burime të kufizuara shumë gra diagnostikohen në faza të avancuara të sëmundjes.
Pjesë e mesazheve të Tetorit Rozë është edhe rëndësia e njohjes së trupit dhe konsultimit me mjekun në rast të ndryshimeve të pazakonta në gji. Kontrollet dhe ekzaminimet periodike, përfshirë mamografinë sipas moshës dhe faktorëve të rrezikut, ndihmojnë në zbulimin e hershëm të sëmundjes.
Tetori Rozë synon të përcjellë një mesazh të thjeshtë: ndërgjegjësimi, kontrolli dhe diagnostikimi i hershëm mund të shpëtojnë jetë.
