Kryeministri i Britanisë, Boris Johnson njoftoi dje për ‘lockdown’-in e tretë pas shpërthimit të rasteve me koronavirusin e ri. Ndërsa ministri Michael Gove ka bërë sot paralajmërimin e fortë se bllokimi mund të fillojë të hiqet gradualisht në muajin mars, por theksoi se afati kohor varet nga qeveria që plotëson synimet e saj shumë ambicioze për vaksinimin.
Ministri pranoi se nuk kishte asnjë “siguri” se masat shtrënguese do të fillojnë të lehtësohen deri në fund të shkurtit, ashtu siç shpresohej. Ndërsa kryeministri vendosi një qëllim se do të vaksinojë më shumë se 13 milionë njerëz gjatë shtatë javëve të ardhshme. Por Gove paralajmëroi që edhe në rastin më të mire, jo ‘të gjitha’ masat shtrënguese do të largohen, pasi ende nuk është luftuar varianti i ri i koronavirusit që ka prekur Britaninë dhe jo vetëm.
Gove tha se një rishikim i situatës do të ndodhte në gjysmën e muajit shkurt. “Ne shpresojmë që të jemi në gjendje të heqim në mënyrë progresive kufizimet pas kësaj, por ajo që unë nuk mund të bëj është të parashikoj – askush nuk mund të parashikojë – me saktësi se çfarë masash do të jemi në gjendje të heqim dhe kur. Ajo që dimë është se sa më efektiv të jetë programi ynë i vaksinimit, aq më lehtë do të jetë heqja e këtyre kufizimeve”, u shpreh ministri për Sky News.
