Presidenti Ilir Meta ka rrëfyer përpjekjet që bëri për të shkuar jashtë vendit për studime pasi u zgjodh deputet në Mars të vitit 1992. Në një intervistë për “Opinion”, Meta rrëfen bisedën me Dritëro Agollin, i cili i tha se ishte në partinë e gabuar dhe i referohet Partisë Socialiste, por i siguroi një takim me ambasadorin rus të asaj kohe. Pavarësisht se çdo gjë ishte në rrugën e duhur, Meta nuk ia doli të studionte në Moskë pasi iu hoq imuniteti.
“Pasi u zgjodha deputet, pas marsit të vitit 1992, bëra disa përpjekje dhe bëra disa aplikime përmes ambasadave këtu, një nga ato edhe hungareze sepse mundësitë ishin të pakta për një informacion dhe një ditë i them Dritëroit kur ishim në parlament dhe një prej këtyre të ambasadave që ishin në llozhë: ‘Nuk më priti mirë fare se i çova një kërkesë për të studiuar e për të bërë një specializim’. E më tha që ‘ti je djalë i mirë, por je në parti të gabuar’.
Më tha, hajde se kam mik ambasadorin rus. Në fakt, disa shokë e shoqe të shkollës kishin shkuar në Rusi. Shkuam e bëmë një bisedë me të, u tregua i disponueshëm, por pas disa muajsh ndodhën ngjarjen e Poliçanit kur mu hoq imuniteti dhe nuk shkoja dot. Marrëveshja ime me drejtuesit e PS ishte kjo, e para unë nuk duhet të bëhesha deputet, e dyta, edhe nëse do të bëhem do të iki për studime jashtë vendit, kështu që nuk e bëj dot”, tha Meta.
