Sezoni turistik i këtij viti po shënon një rritje të numrit të turistëve që kanë zgjedhur të vizitojnë kalanë e Shkodrës.
Drejtoria Rajonale e Kulturës Kombëtare në Shkodër ka ndarë shifrat në rritje të numrit të turistëve për tr javët e para të muajit gusht të 2019-ës dhe të një viti më parë.
“Numri i vizitorëve ka shënuar rritje ku sipas shifrave të bëra publike në nga data 1-21 gusht ka pasur 13, 630 vizitorë ndryshe nga një vit më parë ku shifrat flasin vetëm për 11, 593 vizitorë. E thënë ndryshe ky vit ka pasur 2 037 vizitorë më shumë se vitin e kaluar”, bën të ditur DRKK, Shkodër.
Sipas DRKK, në muajin korrik të këtij viti kjo kala u vizitua nga 16, 548 vizitorë.
Kalaja e Rozafës ngrihet mbi një kodër shkëmbore në perëndim të qytetit, e rrethuar nga ujërat e tre lumenjve: Drinit, Bunës dhe Kirit. Kështjella Rozafa është monumenti historik më antik. Në muret rrethuese të kalasë, të cilat përfshijnë rreth 9 ha tokë, dallohen qartë ndërtimet e katër periudhave: Balshajve (shek. XIV), zotërimi venecian (shek. XV), pushtimi osman (shek. XVI-XVII), dhe e Bushatlinjve (shek. XVIII-XIX).
E ndërtuar gjatë mbretërisë Ilire, përfaqësohet nga një legjendë që tregon mbajtjen e një premtimi, të Besës legjendare.
Objekte të tjera me vlera të mëdha kulturore e që tregojnë shumë për historitë e kaluara të popullit tonë janë, cisternat e ujit të shek XV, katedralja e shek XIII, e cila pas pushtimit osman u kthye në xhami. Po kështu aty ndodhet edhe muzeu i Rozafës, i cili shpjegon periudhat e ndryshme të kalasë.
