Ministri grek i Mbrojtjes Panos Kammenos pas konfliktit me Nikos Kotzias që çoi në dorëheqjen e këtij të fundit ka paralajëmëruar edhe vetë kryeministrin Tsipras me largimin nga qeveria nëse kryeministri dërgon në parlament marrëveshjen e Prespës për emrin e ri të Maqedonisë.
Partia Grekët e Pavarur (ANEL) është një kundërshtare e vendosur e marrëveshjes me Maqedoninë për emrin.
Kotzias dha dorëheqjen javën e kaluar pas një përplasjeje me Kammenos lidhur me marrëveshjen, por qeveria thuhet se kërkon të shmangë një përshkallëzim të tensionit.
Kammenos është nën presion nga ANEL që të largohet nga koalicioni, por këmbëngul se do të mbetet derisa marrëveshja të shkojë në Parlamentin grek për ratifikim.
“Kur marrëveshja të vijë në Parlament, ne do të tërhiqemi”, tha ai në një mbledhje të këshillit kombëtar të ANEL-it të dielën.
Pavarësisht kundërshtimit të ANEL ndaj marrëveshjes, qeveria duket e bindur se ka mbështetje të mjaftueshme për ta ratifikuar atë në Parlament.
