Lufta Rusi-Ukrainë ka sjellë shumë humbje jete, të plagosur, shkatërrim, të larguar nga territoret ukrainase, por mbrëmë solli edhe një lajm të mirë. Teksa bombat e Vladimir Putin godisnin Kievin, mbrëmë një 23-vjeçare solli në jetë një vajzë.
Lajmin e bukur e ka dhënë Kryetarja e Konferencës së Demokracisë në Veprim, Hannah Hopko. Mes kaosit dhe zhurmave të raketave dhe sirenave të luftës, pak para orës 20.30, Mia e vogël erdhi në jetë. Britmat e nënës nga dhimbjet e lindjes ishin dëgjuar nga policia ukrainase, e cila kishte nxituar për të dhënë ndihmën e saj.
E reja e cila u bë nënë mes kaosit dhe luftës, ishte e fshehur në një strehë në qytet, ndërsa të shtënat me armë zjarri dëgjoheshin nga jashtë. Ndërkohë një oficer ukrainas, Mykola Shlapak, tha se ata e ndihmuan të lindte vajzën e vogël dhe më pas lajmëruan një ambulancë që i dërgoi më pas në spital.
Nëna dhe vajza janë mirë dhe gëzojnë shëndet të plotë. Lindja e nënës ukrainase u pa si shpresë në këtë kohë të mjerueshme. Fotografia e tyre e parë u cilësua si fener shprese në orët më të errëta të Ukrainës.
