Konsolidimi i tokës bujqësorë si një instrument për zhvillimin e qëndrueshëm të bujqësisë, është në fokus të programit të punës së qeverisë për periudhën afatmesme 2020- 2022. Ministria e Bujqësisë dhe Zhvillimit Rural, në buxhetin e vitit 2020, adreson një mbështetje të veçantë në mbështetje të konsolidimit të tokës bujqësore.
Sipas këtij institucioni, konsolidimi i tokës është i lidhur drejtpërdrejtë me zhvillimin e bujqësisë së qëndrueshme dhe përmirësimin e gjendjes social-ekonomike të zonave rurale nëpërmjet nxitjes së modelit të konsolidimit.
Bujqësia në Shqipëri është një aktivitet ekonomik parësor që siguron 18-20 % të prodhimit të brendshëm bruto. Në zonat rurale jeton rreth 47 % e popullsisë së vendit dhe toka bujqësorë zë rreth 24 % të sipërfaqes së përgjithshme të territorit. Si rezultat i privatizimit të tokës u krijuan rreth 480 mijë ferma private. Në këtë proces ndodhi fragmentimi ose copëzimi masiv i tokës.
Ndaj procesi i konsolidimit, i përfshirë në kuadrin e zhvillimit rural, me pjesëmarrjen e grupeve të interesit dhe komunitetin, synon gjenerimin e burimeve ekonomike e financiare, për të siguruar përmirësime të jetës rurale, treguesit ekonomik dhe financiar dhe menaxhimin e tokës. Gjithashtu krijimin e kushteve për menaxhimin dhe përdorimin racional të tokës, për mbrojtjen dhe rritjen e pjellorisë, përmirësimet ekologjike dhe peizazhit, mënjanimi nga braktisja, rritja e prodhimit dhe ulja e kostos përmes përmirësimit të mekanizimit, ujitjes dhe praktikave të mira bujqësore. Atsh
