Një video e publikuar në rrjetet sociale ka shkaktuar reagime të forta dhe zemërim në opinionin publik, pasi shfaq momentin kur një drejtues mjeti përplas qëllimisht një qen që ndodhej në rrugë.
Pas publikimit të pamjeve, shërbimet e Komisariatit të Policisë Korçë kanë kryer veprimet verifikuese për identifikimin e automjetit dhe drejtuesit të tij.
Sipas policisë, shtetasi me inicialet Gj.Ç. është shpallur në kërkim, ndërsa ndaj tij ka nisur procedimi penal për veprën penale “Vrasja me dashje e kafshës së shoqërimit”, mbetur në tentativë.
Nga hetimet paraprake rezulton se kafsha ka pësuar dëmtime si pasojë e përplasjes së qëllimshme. Ndërkohë, ngjarja ka ngjallur reagime të shumta në rrjetet sociale, ku qytetarët kanë kërkuar ndëshkimin e autorit dhe zbatimin e ligjit për mbrojtjen e kafshëve.
