Zv.kryeministrja dhe ministrja e Infrastrukturës dhe Energjisë, Belinda Balluku njoftoi sot se, ka nisur puna për Korridorin Blu, i cili do të lidhë veriun me jugun e vendit.
Në një postim në rrjete sociale, Balluku publikoi hartën e rrjetit rrugor infrastrukturor ku do të përqendrohen investimet për realizimin e këtij projekti të rëndësishëm.
“Numri i shtuar i vizitorëve në këtë sezon, padyshim ka rënduar situatën e trashëguar të trafikut në zonën Milot – Kashar”, u shpreh Balluku.
Balluku theksoi se, “lajmi i mirë është se tashmë ne kemi nisur nga puna për ta lidhur Shqipërinë Perëndimore nga veriu në jug me Korridorin Blu”.
Sipas saj, në Thumanë – Kashar, punohet me ritme të shpejta dhe është realizuar mbi 40% e volumeve. Për të vijuar me segmentet, Milot – Thumanë, Kashar – Lekaj.
“Për aksin rrugor Lekaj – Fier, janë tre kontratat që po lidhim për të nisur menjëherë nga puna. Ndërkohë që për segmentin Milot – Balldren hapim garën e ndërtimit në vjeshtë dhe për rrugën Murriqan – Lezhë që është segmenti që na lidh me Malin e Zi. Aktualisht konsulentët e WBIF po hartojnë projektin paraprak, të cilin pritet ta dorëzojnë në Dhjetor 2023”, tha Balluku.
