Komisioni Qëndror i Zgjedhjeve ka vendosur këtë të mërkurë që votimi dhe numërimi elektronik për zgjedhjet e ardhshme të 14 Majit 2023 të bëhet në tre bashki. Ndryshe nga Vora ku u bë dy vite më parë, tashmë listës i bashkohet dhe Elbasani e Kamza.
Kjo pikë e rendit të ditës mori dakordësi nga palët, ndërsa vendimi erdhi pas shtesës së fondit të qeverisë për KQZ, me një shumë prej 800 milionë lekë. Ky projekt pilot do të aplikohet në 335 qendra votimi në këto 3 bashki.
Votimi dhe numërimi elektronik ishte një risi në zgjedhjet e 25 prillit 2021, kur u pilotua për herë të parë në Tiranë, pasi rezultati doli pak orë pas përfundimit të orarit zyrtar të votimit. Pasaktësitë janë gati të papërfillshme si në votim ashtu dhe në numërim.
Nisur nga eksperienca pozitive e zgjedhjeve parlamentare, Komisioni Qëndror i Zgjedhjeve vendosi që në 6 mars 2022 të aplikonte këtë projekt pilot dhe në Bashkinë e Vorës. Rezultati aty doli në kohë rekord, ndryshe nga qendrat e tjera ku u votua dhe numërua manualisht.
Në zgjedhjet lokale të 14 Majit, është vendosur që votimi dhe numërimi elektronik të shtrihet në tre bashki. Vendimi është pranuar dhe nga përfaqësuesit e partive politike, edhe pse më herët ata kishin kërkuar që projekti të shtrihej në 6 zona.
