Dy ditë më parë në qendër të qytetit Swansea, të Britanisë së Madhe, është vrarë Mark Bloomfield, i cili ka qenë edhe ndihmës special i Nënës Terezë.
Mediat britanike raportojnë se 51 vjeçari është vrarë pas një zënke që ndodhi në një prej bar-kafeneve të këtij qyteti. Deri tani, policia ka bërë të ditur se lidhur me vrasjen e tij janë arrestuar tre persona, një 21 vjeçar, një 61 vjeçar si dhe një grua 50 vjeçe.
Sidoqoftë, njerëz të afërt me Bloomfield kanë deklaruar se ai do të kujtohet gjithmonë për veprat e panumërta të mira që ka bërë.
“Si ndihmës i veçantë i Nënë Terezës në Kalkutë, ai ishte një kontribuues thelbësor për misionin e saj dhe për ata që kujdesej”, u shprehën fillimisht familjarët e tij përmes një deklarate.
Veç këtyre, Bloomfield ka ndërtuar kampe kirurgjike në Indi, si dhe ka themeluar shkolla që ofronin mundësi edukimi për vajza. Sidoqoftë, familjarët njoftuan se organet e viktimës do t’i dhurojnë për ata që kanë nevojë, në mënyrë që ai të ketë ndikim akoma në jetën e njerëzve.
