Më 2 mars Monika Kryemadhi i ftoi të gjithë shqiptarët të bashkohen në Bulevardin “Dëshmorët e Kombit”, për të treguar që ‘rilindja’ është një mashtrim i madh për ta. Duke paraqitur gjendjen e vështirë në të cilën po jetojnë shqiptarët nën qeverisjen e Edi Ramës, Kryemadhi dha nga Vlora edhe arsyet pse do të jetë në shesh në atë ditë.
Kryemadhi: Do të jem në bulevard jo për Ilir Metën si President, as për shkeljet kushtetuese që ka bërë ‘rilindja” dhe Edi Rama, por do të jem në bulevard që e gjithë historia e ‘rilindjes’ dhe gjithë përralla dhe fabula mashtruese e Edi Ramës që ka ndërtuar për Shqipërinë, jo vetëm që është një mashtrim i madh për shqiptarët, por është mashtrim i madh për ndërkombëtarët.
Kryetarja e LSI kërkoi llogari nga qeveria përse nuk ka vënë përpara drejtësisë autorët e vrasjes së 51 viktimave, që u vranë në pallatet e shkatërruara nga tërmeti i 26 nëntorit.
Kryemadhi: Kemi parë se si arreston pensionist që nuk mund të paguajnë dot energjinë elektrike, por sot e kësaj dite nuk kemi asnjë të arrestuar për 51 viktimat e tërmetit. Bebe Rexha ka marrë përsipër për të ndërtuar dy shtëpi, një në fshatin e Bubqit dhe një në fshatin Bizë. E sot e kësaj dite, pas tre muajsh, se kjo është dhe njeri me famë botërore, nuk ia ka dhënë lejen e ndërtimit sepse thotë na duhet leje zhvillimore.
Kryemadhi bëri dhe premtimet e saj, nëse në qeverisjen e ardhshme do të jetë në qeveri. Ajo premtoi mbështetje për studentët dhe gratë.
