Shifrat e aksidenteve në vendin tonë vijojnë të jenë të larta. Sipas të dhënave të përditësuara nga Instituti i Statistikave, në 3 muajt e parë te vitit janë regjistruar 323 aksidente rrugorë, ndërsa krahasuar më një vit më parë po në të njëjtën periudhë kanë ndodhur vetëm 264 të tilla. Sipas ekspertit të sigurisë rrugore, Arben Luzi, shkak është lëvizja e parregullt e qytetarëve të cilët përdorin biçikletën, duke i shtuar këtij fakti edhe ndryshimin e sinjalistikës.
“Një pjesë e mirë e aksidenteve vijnë dhe nga biçiklistët. Po t’i shikojmë në qytetin e Tiranës janë bërë shumë hapa ku është kërkuar që të bëhen rrugë vetëm për kalimin e biçikletave. Në shumë rrugë kanë ndryshuar formën e tyre, janë bërë me korsi të dedikuar vetëm për kalimin e biçikletave dhe ndërkohë shikon shumë drejtues të mjeteve me biçikletë që qarkullojnë në rrugë përkrah makinave, aq më keq dhe në mes të tyre.
Shumica e rrugëve në Tiranë janë një-kalimëshe, domethënë me dy korsi me një sens lëvizje,” thotë Luzi. Me ardhjen e emigrantëve për pushime, fluksi i qarkullimit rritet sidomos në kryeqytet. Eksperti rrugor ka një apel për ta.
“Kujdes, kujdes dhe vetëm kujdes në drejtimin e mjeteve por kryesisht do t’i jepja edhe këmbësorëve të cilët kapërcejnë karenxhatën vend dhe pa vend,” tha Luzi. Vetëm 1 natë më parë dy automjete u përplasen me njëra-tjetrën. Për fat të mirë nga aksidenti nuk pati të lënduar, por vetëm dëme materiale.
