Dy persona janë vënë në prangat e policisë së Kukësit pasi për arsye pronësie po ziheshin me njëri-tjetrin.
Sipas policisë mësohet se falë ndërhyrjes është bërë i mundur parandalimi i përshkallëzimit të mëtejshëm të këtij konflikti ku këto dy shtetas po godisnin njëri-tjetrin me mjete të forta. Burimet thanë se arrestuan në flagrancë shtetasit me inicialet D. B., 42 vjeç dhe F. M., 31 vjeç, të dy banues në fshatin Bele.
NJOFTIMI I POLICISE
Ndërhyrja e shërbimeve të Policisë parandalon përshkallëzimin e mëtejshëm të një konflikti për motive pronësie, mes 2 shtetasve. Vihen në pranga 2 shtetasit që u konfliktuan fizikisht dhe goditën njëri-tjetrin, me mjete të forta. Gjendet në automjetin e njërit prej shtetasve të arrestuar dhe sekuestrohet nga Policia, një shkop druri që dyshohet se është përdorur gjatë konfliktit.
Shërbimet e Policisë Kukës, menjëherë pas njoftimit për një konflikt me mjete të forta mes dy shtetasve, në fshatin Lojme, kanë ndërhyrë menjëherë për të parandaluar përshkallëzimin e konfliktit. Në vijim të veprimeve, specialistët për Hetimin e Krimeve në Komisariatin e Policisë Kukës arrestuan në flagrancë shtetasit D. B., 42 vjeç dhe F. M., 31 vjeç, të dy banues në fshatin Bele, pasi kanë goditur njëri – tjetrin dhe automjetet që përdornin, me mjete të forta.
Gjatë kontrollit në automjetin e shtetasit D. B., shërbimet e Policisë kanë gjetur një shkop druri që dyshohet se është përdorur gjatë konfliktit. Ky shkop u sekuestrua në cilësinë e provës materiale, bashkë me 2 automjetet në pronësi të shtetasve të arrestuar. Materialet u referuan në Prokurorinë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
