Përparim Kalo është anëtari i gjashtë i Gjykatës Kushtetuese, i cili u emërua me urgjencë nga Presidenti Ilir Meta gjatë ditës së sotme. Këshilli i Emërimeve në Drejtësi i dërgoi sot kreut të shtetit dy kandidatura, përkatësisht të Kalos dhe atë të Aleksandër Tomës. Emërimi i Kalos plotëson një prej kushteve të përsëritura shpesh nga ndërkombëtarët që të ngrihet Gjykata Kushtetuese para se të përfundojë viti 2020. Kujtojmë se Gjykata Kushtetuese ishte jofunksionale prej gati 3 vitesh.
Emrat e gjyqtarëve që ngritën sërish këtë Gjykatë janë: Vitore Tusha, gjyqtare me kompetencat e Kryetarit të Gjykatës Kushtetuese; Altin Binaj, gjyqtar; Elsa Toska, gjyqtare; Marsida Xhaferllari, gjyqtare; Fiona Papajorgji, gjyqtare; Përparim Kalo, gjyqtar.
E vetmja kandidate e kualifikuar për vakancën e tretë të presidencës është Sonila Bejtja.
Njoftim i Institucionit të Presidentit të Republikës
23 dhjetor 2020 Presidenti i Republikës, Sh.T.Z Ilir Meta ka administruar sot nga Këshilli i Emërimeve në Drejtësi, Listën Përfundimtare të Renditjes së Kandidatëve të lejuar për kandidim dhe Raportin e Arsyetuar të Renditjes së tyre për plotësimin e vendit vakant në Gjykatën Kushtetuese (vakancë e parakohshme).
Sipas praktikës dokumentare të dërguar, Këshilli i Emërimeve në Drejtësi me vendimin nr. 59, datë 23.12.2020, ka vendosur miratimin e listës përfundimtare të renditjes së kandidatëve për gjyqtar në Gjykatën Kushtetuese, në vendin vakant, vakancë e parakohshme, e shpallur nga Presidenti i Republikës në datën 07.02.2018, e rishpallur në datën 27.09.2019 dhe e rishpallur për herë të tretë në datën 24.09.2020, me renditjen e kandidatëve si më poshtë:
1) Përparim Kalo 90.29 Pikë 2) Aleksandër Toma 75.57 Pikë
Presidenti Meta, pasi u njoh dhe vlerësoi praktikën dokumentare të vendimmarrjes, vlerësimit dhe të renditjes së kandidatëve të miratuara nga Këshilli i Emërimeve në Drejtësi; si dhe duke vlerësuar njëkohësisht nevojën jetike që ka vendi për plotësimin dhe funksionimin sa më parë të Gjykatës Kushtetuese, në përfundim të shqyrtimit, në mbështetje të neneve 93, 125 pika 1, 127 pika 3, 129, 149/d pika 1, të Kushtetutës së Republikës së Shqipërisë, neneve 7, 7/a pika 4, 7/b, 7/dh pika 2, të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, pa asnjë vonesë, me Dekretin nr. 11882, datë 23.12.2020, ka vendosur që:
-Zoti Përparim Kalo emërohet gjyqtar i Gjykatës Kushtetuese.
