Të shtëna me armë janë shënuar ditën e sotme në Peqin, ku për pasojë një person ka mbetur i plagosur.
Bëhet me dije se pas një konflikti shtetasi Sokol Dehima ka qëlluar me armë Dielli Çelën 55 vjeç. I plagosuri ndodhet në spital jashtë rrezikut për jetën, ndërsa polica është në kërkim të autorit 52-vjeçar. Çela është ish-kreu i Partisë Demokratike në Peqin.
Grupi hetimor, në drejtimin e Prokurorisë, po punon për zbardhjen e rrethanave të ngjarjes.
“Rreth orës 11:10, në spitalin e Peqinit, është paraqitur për të marrë ndihmë mjekësore dhe ndodhet jashtë rrezikut për jetën, shtetasi Diell Çela, 55 vjeç, banues në Peqin, i cili dyshohet se është dëmtuar me armë zjarri, gjatë një konflikti me shtetasin S. D., rreth 52 vjeç, banues në Peqin. Shërbimet e Policisë kanë ngritur pika kontrolli dhe janë duke kontrolluar territorin, me qëllim kapjen e autorit të dyshuar, shtetasit S. D.
Grupi hetimor, në drejtimin e Prokurorisë, po punon për zbardhjen e rrethanave të ngjarjes”-njoftoi policia.
Diell Çela, ish-kryetar i PD-së në Peqin ka qenë edhe më parë protagonist i ngjarjeve të kronikës. Në shkurt 2016 PD akuzoi ish-deputetin Aqif Rakipi dhe vëllanë e tij sepse sipas saj, rrahën barbarisht kryetarin e PD-së së Peqinit për motive të pastra politike.
Sipas ish-deputetit Arben Ristani, ngjarja ndodhi në një lokal Pajovë të Peqinit, ku kryetari i degës së PD në këtë qytet, Diell Çela, “është rrahur barbarisht nga deputeti i PDIU Aqif Rakipi dhe vëllai i tij”.