Pezullohen dy oficerë policie në Vlorë. Shkak është bërë publikimi i një fotoje në rrjetet sociale, ku inspektori me inicialet F. Xh. dhe inspektore V. Ç shihen në një moment intim duke u puthur në makinën e patrullës së policisë, e cila gjendet e parkuar në një lagje.
“Pas publikimit në rrjetet sociale të një fotoje në të cilën shfaqen dy punonjës policie në automjetin e shërbimit duke u puthur, Drejtori i Drejtorisë Vendore të Policisë Vlorë ka pezulluar menjëherë nga detyra inspektor F. Xh. dhe inspektore V. Ç., me detyrë punonjës të Patrullës së Përgjithshme të Komisariatit të Policisë Vlorë” njoftoi policia e Vlorës në një komunikatë për mediat.
Ata akuzohen për shkelje të Kodit të Etikës dhe Rregullores së Policisë së Shtetit.
Njëkohësisht, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur ecurinë disiplinore ndaj punonjësve të Policisë, për shkelje të rëndë.
