Vijon të jetë mjaft e tensionuar dhe gjatë ditës së sotme situata në zonën e Astirit, ku që prej mëngjesit janë parë në zonë punonjës të policisë bashkiake dhe të policisë së shtetit. Por në këto momente forcat policore janë shtuar sërish, ku kanë mbërritur dhe forcat ‘Shqiponja”.
Ata kanë futur njërin prej protestuesve në furgonin e policisë me forcë por kjo ka shkaktuar irritimin e banorëve dhe situata është tensionuar së tepërmi. Rezistenca e banorëve të tjerë ka bërë që furgoni i policisë të mos lëvizë por ka liruar protestuesin.
Në pamjet ekskluzive të siguruara nga ‘Fax News’ shihet dhe momenti i shoqërimit me forcë i banorit dhe rezistenca e banorëve të tjerë për ta liruar.
Pasi u lirua nga policia protestuesi tha për ‘Fax News’ se ai ishte dhunuar në furgonin e policisë.
“Kam punuar 15 vite në Angli dhe e kam sjellë të gjithë mundin këtu në këtë shtëpi, dhe të vijë të ma prishë ky ropq*ri”, u shpreh banori që u shoqërua me forcë nga ana e policisë.
Banori vijoi më tej duke thënë se kjo është hera e katërt që po tentohet që ti prishet banesa dhe lokali, ku ka mundur që të punësojë një pjesë të të afërmve të tij që gjenden në kushte të rënduara ekonomike.
Protestuesit u shprehën më parë se Erion Veliaj është një mashtrues, dhe po kërkon që të përdorë policët në interes të karriges së tij. Disa nga thirrjet e banorëve janë: Ju lutemi shumë kemi paguar çdo faturë me OSHEE-në mos e hiqni kabullin!
“Gënjeu dje Erion Veliaj duke thënë se prishi shtëpitë në Unazës e Re, ai bythpambuk nuk mund të hyjë këtu. Këtu do të ketë fundin e vetë Edi Rama, se këta janë hallexhinj, të mos vërë policinë kundër nesh Edi Rama”,shprehet një tjetër prej qytetarëve.
“Ka mbaruar ajo punë, ta marrë vesh Edi Rama dhe Erion Veliaj që nuk do të ndërhyjë këtu pa na vrarë ne më parë”, vijon më tej një tjetër prej banorëve.
Ndërkohë që një prej punonjësve të policisë thotë se ata janë duke kryer detyrën e tyre shtetërore.
