Një konflikt mes fqinjëve është regjistruar pasditen e kësaj të marte në fshatin Karbunarë në Vlorë.
Një 58-vjeçar me iniciale F.K. ka kërcënuar me armë zjarri kallashnikov fqinjin e tij, 68-vjeçarin N.Xh. pas një konflikti të çastit.
Në momentin që policia mbërriti në vendngjarje, shtetasi F.K. ka hedhur në tokë kallashnikovin dhe është larguar me makinë. Policia ka shpallur në kërkim 58-vjeçarin dhe ka sekuestruar armën e zjarrit tip kallashnikov.
Njoftimi i policisë: Falë ndërhyrjes në kohë të Policisë, parandalohet përshkallëzimi i mëtejshëm i konfliktit me armë zjarri. Shpallet në kërkim 58-vjeçari që kërcënoi me armë fqinjin e tij. Sekuestrohet arma e zjarrit automatik dhe municion luftarak.
Shërbimet e Stacionit të Policisë Selenicë, pas marrjes së njoftimit se në fshatin Karbunarë, Selenicë, një shtetas kishte kërcënuar me armë zjarri fqinjin e tij, janë nisur menjëherë drejt vendngjarjes. Falë ndërhyrjes së shpejtë dhe punës së mirorganizuar, shërbimet e Policisë kanë parandaluar përshkallëzimin e mëtejshëm të konfliktit.
Nga verifikimet rezultoi se shtetasi F. K., 58 vjeç, ishte konfliktuar për motive të dobëta, me shtetasin N. Xh., 68 vjeç, banues në Karbunarë, dhe e kishte kanosur atë me armë. 58-vjeçari, sapo ka evidentuar mbërritjen e shërbimeve të Policisë në vendngjarje, ka hedhur armën e zjarrit dhe është larguar me automjetin e tij tip “Benz”.
Në vijim të veprimeve, specialistët e Hetimit të Krimit të Stacionit të Policisë Selenicë shpallën në kërkim shtetasin F. K., 58 vjeç, banues në fshatin Karbunarë, Selenicë, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Kanosja”.
Në cilësinë e provës materiale u sekuestrua arma e zjarrit automatik dhe një sasi municioni luftarak. Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme.
