Në 18 Mars ora 11.00 në ambjentet e Pallatit Labëria, u organizua ceremonia e dhënies së vlerësimit “Mirënjohje e Qarkut Vlorë”, për zonjën LEFTERI METKAJ.
Me mbështetjen e Ambasadës shqiptare në Athinë dhe Bashkisë së Athinës, znj. Metkaj ishte e para mësuese shqiptare e cila themeloi shkollën shqipe në Athinë. Prej gjashtë vitesh ajo ka hapur tri shkolla shqipe për fëmijët e emigrantëve shqiptarë me përkushtim në cilësinë e mësimdhënies.
Duke u mbështetur në kontributin e zonjës Lefteri Metkaj, në përkushtimin e saj ndaj detyrës së mësuesit, në arsimin kombëtar dhe jashtë atdheut, me propozimin e tri shoqatave, kryetari i Këshillit të Qarkut Vlorë,Ervis MOÇKA i dorëzoi certifikatën e mirënjohjes me motivacion: “Për punë të shquar në arsimin kombëtar për afër katër dekada brënda dhe jashtë atdheut si mësuese e gjuhës shqipe në Shqipëri dhe me fëmijët e emigrantëve në Greqi. E dalluar për veprimtari patriotike jashtë Atdheut”.
Në këtë ceremoni morën pjesë shumë intekektualë të qytetit të Vlorës, dashamirës, shkrimtarë, përfaqësues të shoqatave patriotike dhe kolegë të cilët vlerësuan veprimtarinë e znj. Metkaj.
Gjatë ceremonisë u lexuan dhe përshëndetjet për ceremoninë dhe vlerësimi për veprimtarinë e znj. Metkaj, që kishin dërguar ambasadorja e Republikës së Shqipërisë në Greqi dhe ambasadori i Kosovës në Shqipëri.
