Një 25-vjeçare shqiptare, e cila udhëtonte drejt Greqsë së bashku me dy fëmijët e saj të mitur, u arrestua nga policia helene në Igumenicë dy ditë më parë, pasi në mjetin që drejtohej prej saj u gjetën mbi 35 kg marijuanë.
Në bagazhin e makinës së 25-vjeçares nga Saranda, Kostandina Mata, u gjetën 33 pako marijuanë.
Dyshohet se e reja ishte furnizuar me drogë në tokën greke, pasi droga mund të jetë futur nga kufiri i gjelbër me Shqipërinë, e më pas ishte vendosur brenda mjetit të 25-vjeçares, për t’u nisur drejt destinacionit final.
Ndërkohë mediat greke kanë publikuar sot foto nga operacioni policor, ku shihet mjeti tip “Benz A Class” i mbushur me lëndë narkotike. Gjithashtu theksohet se makina ishte marrë me qira, ndërsa 25-vjeçarja ka përdorur fëmijët e saj të vegjël, të cilët ndodheshin në sediljen e pasme të makinës, për të shmangur dyshimet e policisë.
Mësohet se dy fëmijët janë të moshës 2 vjeç e gjysmë dhe disa muajsh, dhe nëpërmjet përdorimit të tyre, Konstadina Mata besonte se do të krijonte përshtypjen e një nëne të dashur.
Por sipas mediave greke autoritetet në Igumenicë kishin marrë informacion për drogën që ndodhej në makinën e nënës shqiptare.