Liderët shqiptarë urojnë Kosovën për krijimin e ushtrisë

Presidenti, Kryeministri dhe kryetari i opozitës në Shqipëri kanë uruar të premten Kosovën për krijimin e ushtrisë.

Kuvendi i Kosovës miratoi sot ligjin që bën të mundur transformimin e Forcës së Sigurisë së Kosovës në ushtri.

Presidenti Ilir Meta e ka quajtur krijimin e Forcave të Armatosura të Republikës së Kosovës një vendim historik që “dëshmon qartë që Kosova është e aftë të marrë përgjegjësi të reja në ndërtimin e institucioneve demokratike dhe për të kontribuar vendosmërisht për paqen, stabilitetin e rajonit dhe fqinjësinë e mirë.” “Fryma euro-atlantike qëndron në themel të këtij ndryshimi historik”, tha ai.

Ndërsa kryeministri Edi Rama shkroi tri herë urime bashkangjitur një fotoje të Presidentit dhe Komandantit të Përgjithshëm të Forcave të Armatosura të Kosovës, Hashim Thaçi.

“Urime Kosovë për Ushtrinë!”, shkroi edhe kryeopozitari Lulzim Basha. Ai tha se pas Pavarësisë, kjo është ngjarja e dytë e përmasave kombëtare dhe historike. “Me Ushtrinë e saj Kosova do të jetë më e sigurt, rajoni më në paqe, kombi shqiptar i integruar dhe më i fortë. Nderim të rënëve për liri, mirënjohje miqve të mëdhenj që na mbështetën!”