Lidhja Demokratike e Gruas së Shqipërisë, në kuadër të 8 marsit festës së nënës dhe gruas, dhuroi 10 mijë lule në të gjithë Shqipërinë për gra e vajza. Nëpërmjet një postimi në rrjetet sociale, LDGSH shprehet se nëpërmjet luleve shpërndan më shum shpresë, optimizëm dhe besim. “Sot ishim me mijëra gra dhe vajza në të gjithë Shqipërinë. Dhuruam mbi 10 mijë lule nga Veriu në Jug, në Tiranë, Shkodër, Durrës, Elbasan, Korcë, Fier, Vlorë, Lezhë, Berat, Dibër, duke shpërndarë më shumë shpresë, optimizëm dhe besim se ditë më të mira do të vijnë! Ndryshimi nis me gratë! Gezuar 8 Marsin”, thuhet në njoftim.
Ndërkohë, kryetarja e Lidhjes Demokratike të Gruas Albana Vokshi shprehet se “vetëm duke thënë ‘gëzuar ditën e gruas’ nuk vjen asnjë ndryshim”. Sipas saj gratë duhet të veprojnë, ndërsa thekson se ato nuk kanë nevojë për mëshirë.
Albana Vokshi: Mesazh i Kryetares se Lidhjes Demokratike te Gruas, Albana Vokshi: 8 marsi është dita kur gruaja është në qendër të vëmendjes. Ne jemi të lumtura, kur na urojnë, kur na dhurojnë lule, kur fëmijët na kushtojnë një vizatim frymëzues plot ngjyra. E gjithë bota është e jona për disa minuta, por ne e dimë se kjo nuk mjafton. Vetëm duke thënë “Gëzuar Ditën e Gruas” nuk vjen asnjë ndryshim.
Varfëria, përjashtimi, diskriminimi, dhunimi mbeten aty si kërcënimi më i madh i dinjitetit të gruas. Ne duhet të veprojmë! Ne nuk kemi nevojë për mëshirë! Na duhen mundësi reale dhe liri e vërtetë për të marrë vendimet e duhura për vete dhe fëmijët tanë! Këto mundësi nuk vijnë dot nga një qeveri që përdor gratë si fasadë, por nuk investon për shëndetin më të mirë të grave, të arsimimit më të mirë të tyre dhe, për rrjedhojë, as të punësimit të grave me vende të mirëpaguara. Në duhet t’i krijojmë vetë mundësitë tona, duke nisur me ndryshimin e atyre që na qeverisin! Le ta përdorim fuqinë, mençurinë dhe sakrificën tonë të përditshme për të sjellë ndryshimin! Ndryshimi nis me gratë! Ndryshimi jemi ne!