Paketa e ligjeve kundër medias ka sjellë reagime të forta nga gjithë shoqëria civile, gazetarët dhe organizata ndërkombëtare. Por Partia Socialiste thotë se ka mbështetjen e Bashkimit Europian për miratimin e këtyre ligjeve, që cilësohen si censurë e qeverisë mbi mediat.
Në komisionin parlamentar të Integrimit, kreu grupit parlamentar socialist ,Taulant Balla tha se në asnjë moment nuk cënohet liria e shprehjes. “Beteja më e madhe që ka shoqeria shqiptare është me dezinformimin. Nuk ka nevojë për politike, por të jemi të gjithë bashkë.”- tha Balla. Në emër të mazhorancës, Taulant Balla siguroi se nismat nuk kanë gjetur aspak kundërshtinë e Brukselit zyrtar, i cili ka bërë apele vetëm për rregullime. Në emër të ekzekutivit, në mbrojtje të drafteve ligjore foli ministrja për Marrëdhëniet me Parlamentin, Elisa Spiropali e cila u shpreh se ligji nuk cënon lirinë e shprehjes, por vendosjen e disa rregullave për dinjitetin dhe liritë e njeriut.
Draftet ligjore, pas diskutimeve në komisionet parlamentare, pritet të kalojnë për shqytrim e më pas votim në seancën parlamentare të 18 dhjetorit.
