Punonjësit e policisë, ushtrisë, zjarrfikëseve, shërbimit shëndetësor, por edhe një numër i lartë vullnetarësh që prej momenteve të para të tërmetit që goditi Shqipërinë në orën 03:55 të ditës së sotme janë në zonat më të prekura të tërmetit, Durrës, Thumanë, e Kurbin në përpjekje për të ndihmuar banorët e prekur.
Ministri i Brendshëm, Sandër Lleshaj e ka cilësuar si heroizëm punën e tyre sot.
“I vetmi ngushëllim për tragjedinë e sotme është heroizmi i pashoq i punonjësve të policisë, të ushtrisë, zjarrfikëseve, shërbimit shëndetësor, vullnetarë e shumë të tjerëve. Mirënjohje pa fund për secilin”,- tha ministri Lleshaj.
Një tërmet me magnitudë 6.3 Rihter goditi në orët e para të mëngjesit vendin tonë. Deri tani raportohen 13 viktima dhe mbi 600 të plagosur. Ekipet e shpëtimit po mundohen të nxjerrin nga rrënojat personat që kanë mbetur brenda.
