Një ngjarje e çuditshme ka ndodhur në Lojrat Olimpike 2020. Boksieri i Zelandës së Re, David Nyika, u kafshua nga kundërshtari i tij maroken, Youness Baalla ditën e sotme.
Skena ndodhi pas humbjes, në përqafimin e fundit. Pas ndeshjes, Nyika u shpreh i habitur sesi gjyqtarja nuk e kishte vërejtur këtë incident.
“A e patë ju? Mendoj se gjyqtarja s’e pa. Ajo ishte më së afërmi nesh. Ai nuk arriti të më kafshojë me tërë gojën. Fatmirësisht ai e kishte mbrojtësen e dhëmbëve e cila ishte e djersitur”, tha Nyika, i cili në çerekfinale do të përballet me bjellorusin Uladzislau Smiahlikau.
Ky incident, i cili po e bën xhiron e botës nëpër rrjetet sociale, e sjell në mendje luftën famëkeqe të Mike Tyson kur ish-kampioni i botës ia copëtoi një pjesë të veshit Evander Holyfieldit në vitin 1997.
