LONDËR/ Shkatërrohet grupi i dyshuar kriminal shqiptar pas dy vitesh hetime, 10 të arrestuar!
Një operacion i gjerë policor në perëndim të Londrës ka çuar në arrestimin e 10 personave, të dyshuar si pjesë e një grupi kriminal shqiptar të përfshirë në trafikun e drogës dhe aktivitete të tjera të paligjshme.
Pas dy vitesh hetime, autoritetet britanike kanë ushtruar kontrolle në 14 adresa, ku kanë sekuestruar sasi të konsiderueshme droge, armë të ftohta, automjete dhe rreth 30 mijë paund cash.
Sipas mediave britanike, grupi dyshohet se merrej me importimin dhe shpërndarjen e lëndëve narkotike të klasit A, tregtinë e mallrave të falsifikuara dhe shfrytëzimin e personave vulnerabël.
Gjatë operacionit janë sekuestruar gjithashtu sende luksi me vlerë rreth 200 mijë paund, ndërsa një ambient i dyshuar si bordello është mbyllur nga autoritetet.
Hetimet vijojnë për zbardhjen e plotë të aktivitetit kriminal dhe identifikimin e personave të tjerë të përfshirë.
