Presidenti ukrainas Volodymyr Zelensky ka filluar një fushatë për mbledhjen e fondeve për të ndihmuar Ukrainën të ndërtojë një flotë me drone detare për të mbrojtur qytetet kundër raketave ruse të lëshuara nga anijet luftarake në Detin e Zi.
United 27, një iniciativë që Zelensky filloi për të mbledhur donacione bamirësie pas pushtimit rus në shkurt, tha se Ukrainës i duheshin 100 drone që vepronin në det.
Secili prej tyre kushton 274.000 dollarë, shkruan abcnews.al. Faqja e mbledhjes së fondeve tha se që nga fillimi i pushtimit, Rusia ka lëshuar mbi 4,500 raketa në Ukrainë dhe “çdo goditje ka ardhur nga deti”.
“Ne duhet të mbrojmë ujërat e deteve dhe qyteteve tona paqësore nga raketat ruse të lëshuara nga anijet”, shkroi Zelensky në aplikacionin e mesazheve Telegram të premten.
“Dronët detarë do të ndihmojnë gjithashtu në zhbllokimin e korridorit për anijet civile që transportojnë grurë për botën”, tha ai.
Që nga fillimi i pushtimit të saj në shkallë të plotë në Ukrainë, Rusia ka kryer sulme me raketa nga anijet në Detin e Zi dhe nga Krimea, gadishulli që Moska mori nga Ukraina në vitin 2014 dhe që është shtëpia e Flotës së Detit të Zi të marinës ruse.
Rusia ka përdorur gjithashtu drone ajrore, duke përfshirë të ashtuquajturat modele “kamikaze”, të prodhuara nga Irani, për të sulmuar Kievin dhe infrastrukturën kryesore në të gjithë vendin.
Rusia filloi bllokimin e porteve të Detit të Zi të Ukrainës menjëherë pas pushtimit të shkurtit, duke përfshirë bllokimin e eksportit jetik ndërkombëtar të grurit.
Tre porte ukrainase u zhbllokuan sipas një marrëveshjeje të ndërmjetësuar me Rusinë në korrik nga Kombet e Bashkuara dhe Turqia për të ndihmuar në lehtësimin e një krize globale ushqimore.
Rusia më vonë pezulloi pjesëmarrjen e saj në marrëveshjen e grurit pas asaj që tha se ishte një sulm ukrainas ndaj tre prej anijeve të saj të Flotës së Detit të Zi në fund të muajit të kaluar nga një forcë e kombinuar e dronëve ajrore dhe detare. Moska më vonë iu kthye marrëveshjes, e cila do të përfundojë javën e ardhshme.
“Jam i sigurt se miliona njerëz do të mbështesin këtë zonë të rëndësishme të mbrojtjes së Ukrainës,” shkroi Zelensky për fushatën e mbledhjes së fondeve për dronet detare.
“Të gjithë e kanë parë tashmë se si funksionon,” tha ai.
Ukraina nuk e ka konfirmuar apo mohuar se qëndron pas sulmit me dron ajror dhe detar të tetorit në flotën ruse, për të cilin një deklaratë e postuar në faqen e internetit United24 tha se ishte sulmi i parë i tillë në konfliktin disamujor të kryer ekskluzivisht nga pajisje pa pilot.
“Rusia ka humbur avantazhin e saj dikur të pamohueshëm në ujë”, thuhet në deklaratën e United24.
