Shtëpi nën ujë, rrugë të përmbytura, e ura të dëmtuara. Janë disa nga pasojat që shkaktoi moti i keq që përfshiu vendin të mërkurën. Më problematike situata ishte në qarkun e Lezhës. Dalja e lumit Zmejë në Rrëshën i gjeti të papërgatitur këta banorë të cilët u zgjuan me shtëpitë plot ujë.
Prezencë uji pati edhe në banesat e fshatit Tarazh ndërsa inertet dëmtuan e zhvendosën urën që lidh disa zona. Kryetari i bashkisë Mirditë i cilësoi të konsiderueshme dëmet dhe kërkoi ndihmën e qeverisë për riparimin e tyre. Në aksin Milot – Burel pati rënie gurësh e dherash.
Nga inertet u shkaktuan probleme në rrugët Skuraj–Ulëz si dhe akset më në very Bogë–Theth, Hani i Hotit-Tamarë, Dushaj–Lekbibaj, Kukës–Shishtavec, Bajram Curri–Valbonë, Vau Dejes–Pukë–Kukës. Autoriteti Rrugor shqiptar njoftoi se të gjitha akset janë të kalueshme dhe në terren gjenden grupet e punës së mirëmbajtjes të cilët janë duke bërë pastrimin e akseve.
Në Durrës disa rrugë të brendshme të qytetit përfunduan nën ujë. Vështirësi në qarkullim e lëvizjen e këmbësorëve pati më së tepërmi në lagjen nr1, 13, në Spitallë e Currila. Për shkak të motit të keq u ndalua dalja në det e mjeteve të vogla lundruese. Njëjtë situata ishte edhe në Vlorë.
Që qyteti të shpëtojë përfundimisht nga përmbytjet kryetari i bashkisë, Ermal Dredha tha se lipset një projekt nga ana e qeverisë. Në Fier reshjet nxorën jashtë funksionit tre fidera duke lënë pa energji disa fshatra. OSHEE njoftoi se elektricistët janë në terren për riparimin e defekteve dhe avarive në zonat ku ka pasur ndërprerje të furnizimit me energji.
