Mali i Zi bëhet shteti i dytë në Europë, pas Ishujve Faroe, që deklaron daljen nga pandemia. Në tërësi në Ballkanin Perëndimor ka pasur tkurrje të rasteve dhe rritje të ndjeshme të të shëruarve, duke ngjallur shpresa se shumë shpejt festën malazeze do të mund ta gëzojnë edhe vendet e tjera.
Të dhënat zyrtare të deklaruara nga autoritetet e 7 shteteve të rajonit tregojnë se tashmë mbi 65 për qind e të infektuarve janë shëruar dhe vetëm 3.3 për qind e të infektuarve kanë humbur jetën.
Prirja e rasteve të reja pësoi sërish ulje javën që shkoi, me 267 raste më pak, 855 të infektuar të tjerë krahasuar me 1,122 të një jave më parë. Vlen të thuhet se javën e fundit pati 35 viktima, 8 më shumë se një javë më parë, megjithatë të shëruarit po shtohen më shumë se rastet e reja, 1,624 persona e mposhtën infeksionin vetëm këtë javë.
