Corriere della Sera ka zbuluar detaje lidhur me marrëveshjen e firmosur sot mes kryeministrit Edi Rama dhe homologes së tij italiane Georgia Meloni, sa i përket refugjatëve që do të shpëtohen në det.
Meloni është shprehur gjatë konferencës së përbashkët me Ramën se një qendër pritjeje për refugjatët do të ndërtohet në Portin e Shëngjinit dhe pritet të hapet pranverën e ardhshme.
Media italiane ka zbuluar se marrëveshja nuk do të zbatohet për refugjatët që mbërrijnë në brigjet dhe territorin italian, por ekskluzivisht për ata që shpëtohen në det, me përjashtim të të miturve, grave shtatzëna dhe subjekteve vulnerabël.
Strukturat e krijuara, do të mund të strehojnë gjithsej deri në 3 mijë refugjatë, duke parashikuar rreth 39 mijë refugjatë në vit “për të përfunduar me shpejtësi procedurat për shqyrtimin e kërkesave për azil apo riatdhesimin e mundshëm”.
Strutkurat do të ngrihen në portin e Shëngjinit, ndërsa sipas asaj që shpjegohet nga burimet e Palazzo Chigi, nuk parashikohet asnjë kompensim ekonomik në favor të Shqipërisë.
