Një zjarr që fillimisht dukej i lehtë për t’u menaxhuar në zonën e Kalasë në Delvinë, ka marrë përmasa alarmante duke shkaktuar dëme të konsiderueshme materiale në fshatin Senicë.
Flakët, të favorizuara nga era e fortë, kanë përfshirë 11 shtëpi dhe kanë shkrumbuar kishën 200-vjeçare të Shën Dhimitrit, një monument kulture i kategorisë së parë. Forcat zjarrfikëse janë përpjekur ta vendosin situatën nën kontroll, por puna e tyre është vështirësuar nga terreni i thepisur dhe malor.
Infrastruktura e dobët e fshatit ka ndikuar negativisht në ndërhyrjen e shpejtë, pasi rrugët e ngushta kanë penguar hyrjen e automjeteve zjarrfikëse në afërsi të vatrave të zjarrit.
Për frenimin e përhapjes së flakëve janë angazhuar edhe dy helikopterë, të cilët kanë operuar nga ajri që prej ditës së enjte, deri në momentin kur errësira dhe kushtet e motit kanë bërë të pamundur vijimin e ndërhyrjes ajrore.
Pavarësisht përpjekjeve, zjarri është riaktivizuar gjatë natës për shkak të erës së forte.
Sipas kryeplakut të fshatit Senicë, situata mbetet e vështirë. Janë djegur gjithashtu edhe sipërfaqe të mëdha pyjore, ndërkohë që në rrezik janë edhe disa banesa të tjera. Fshati, që dikur numëronte rreth 100 shtëpi, aktualisht ka vetëm 10 banesa të banuara, pasi pjesa më e madhe e popullsisë është shpërngulur drejt Greqisë.
Autoritetet lokale dhe shërbimet emergjente janë në gatishmëri për të parandaluar përhapjen e mëtejshme të flakëve të cilat janë aktive dhe në fshatrat Vergo dhe Kopaçez, si dhe po rrezikojnë banesat në Palavli.
