Parlamenti shqiptar votoi dje me shumicë votash paketën anti-shpifje, ligj i propozuar nga qeveria, që sipas saj ka si synim rregullimin e mediave audio-vizive dhe online.
Po qeveria ka thënë që ligji do disiplinoi mediat dhe synon luftimin e fenomenit të shpifjes.
Paketa u kundërshtua gjatë nga përfaqësuesi i lirisë së medias në OSBE, Harlem Desir dhe më pas u mbështet prej tij duke thënë se nuk cënohet liria e fjalës së lirë. Por Desir, pak orë pasi Kuvendi miratoi ligjin që është kundërshtuar nga të gjitha organizatat mediatike dhe komuniteti i gazetarëve, ka reaguar sërish.
Këtë herë përfaqësuesi i lirisë së medias në OSBE, ka mbështetur pa kushte vetë-rrregullimin në Maqedoninë e Veriut, duke harruar se pak orë më parë ishte pro rregullimit me ligj të mediave online dhe jo vetëm në Shqipëri.
Sipas zyrës së OSBE në Vienë, “Désir shprehu mbështetjen e tij për vetë-rregullimin e mediave online në Maqedoninë e Veriut, i cili u njoftua sot nga Këshilli i Etikës së Medias së bashku me Shoqatën e Gazetarët e Maqedonisë dhe Dhoma Ekonomike”.
“Vetë-rregullimi i mediave është një mekanizëm i dobishëm për promovimin e informacionit cilësor, ruajtjen e lirisë së editorialit dhe forcimin e besueshmërisë së mediave,” tha Désir.
Nisma synon të promovojë vetë-rregullimin e mediave online përmes, financimit transparent; angazhimin e mediave në internet për të respektuar Kodin e Gazetarëve; dhe publikimi i vendimeve nga Këshilli i Etikës së Medias.
“Shpresoj që kjo punë e përbashkët nga disa organizata në Maqedoninë e Veriut të jetë e dobishme për platformat e mediave online, si dhe për komunitetin e gjerë të mediave,” përfundoi Désir.
Këto deklarata tregojnë se OSBE mbështet dy nisma të kundërta me njëra-tjetrën, rregullimin me ligj nga qeveria dhe vetë-rregullimin me Kod Etike nga komuniteti i gazetarëve dhe tregon që janë përdorur deklarata me dy standarde.
