Me mbështetjen financiare të qeverisë përmes Agjencisë për Zhvillim Bujqësor dhe Rural, familja Zerja në Dibër e ka zgjeruar biznesin familjar duke e shndërruar në një bujtinë mikëpritës. Kryeministri Edi Rama ka publikuar këtë shembull suksesi të familjes Zerja.
“MIRËMËNGJES! dhe me shtëpinë e jufkave të familjes Zerja në Dibër, tashmë kthyer në një bujtinë mikpritëse falë mbështetjes tonë për agroturizmin, ju uroj një të dielë të paqtë”, uroi Rama.
“Këtu jemi në shtëpinë e jufkave. Ky është një biznes familjar. Falë ndihmës së qeverisë shqiptare përmes AZHBR-së, morëm një fond prej 9 milionë lekësh të reja për të ndërtuar agroturizmin tonë, restorantin dhe strukturë pritëse, bujtinën. Edhe bujtinës ia kemi vendosur emrin “Bujtina e jufkave”, falë produktit tradicional dibranë”,- shprehet Fabjon Zerja.
“Në agroturizmin tonë, përpiqemi që të fusim vetëm produktet lokale vendas dhe bashkëpunojmë shumë me baxhot, fabrikat që janë rreth e rrotull që kanë produkte organike nga zona e Dibrës”,- vijon Zerja.
Vizioni i familjes Zerja është ndërtimi edhe një ferme që do të jetë në funksion të agroturizmit. “Aktualisht në biznesin tonë kemi rreth 10 të punësuar, i kemi të gjithë nga zonat përreth. Ne mendojmë të zgjerojmë agroturizmin tonë dhe me një fermë, që do jetë në funksion të agroturizmit”-, përfundon Fabjon Zerja.
