“Më të rrezikshëm se ata të viteve ’97”/ Sulo komenton lirimin e të burgosurve

Analisti Arion Sulo është shprehur se bandat e liruara këto ditë nga burgu janë edhe më të rrezikshme se ato të viteve ’97. I ftuar në emisionin “Real Story” në News24, Sulo tha se në vitin 1997 bandat u krijuan nga kushtet ndërsa në kohët e sotme ata janë më të sofistikuar. Sipas tij, ka pasur nga ata të cilët kanë kontrolluar botën e krimit nga burgjet dhe lidhja që kanë pasur me politikën i ka bërë më të fuqishëm.

“Unë mendoj se vrasja e sotme në Tiranë ngre alarmin që Prokuroria duhet që të ndjekë me kujdes ata që merren me krim jashtë. Meqë flasim për krimin, të liruarit tani nga burgjet janë banda shumë të rrezikshme. Në 1997 ishte koha e atillë, por këta janë më të rrezikshme sepse kanë komanduar botën e krimit edhe nga burgu. Lidhjet me politikën bënë që të fuqizohen akoma më shumë.

Ne do të pësojmë një gjë të paparë, që burgjet tona do jenë vetëm për hajdutët e xhepave dhe ata që kanë vjedhur energjinë elektrike. Kjo sjell efektet e reformës në drejtësi, domethënë vetë reforma nuk është llogaritur mirë”, tha ai.