Në Italia është ekzekutuar një mega-operacion, ku në pranga kanë rënë 334 persona, mes të cilëve, politikanë, avokatë, financierë, zyrtarë të shtetit dhe biznesmenë si dhe u sekuestruan pasuri me vlerë 15 milionë euro. Mes të arrestuarve është edhe ish deputeti i ‘Forza Italia’, Giancarlo Pittelli.
Operacioni “Rilindja-Scott” u zhvillua nga karabinierët e Ros dhe Komandës provinciale të Vibo Valentia dhe kanë goditur të gjitha organizatat e Ndrangheta-s që vepronin në zonën Vibonese dhe që i përkasin klanit të Mancuso di Limbadi. Janë 416 të dyshuar, të akuzuar për vepra të ndryshme për organizatë mafioze, vrasje, zhvatje, fajde, riciklim etj. Në operacion morën pjesë më shumë se 2500 agjentë.
Mega operacioni është në vazhdën e një hetimi që zgjati disa vite dhe që u zhvillua në disa rajone të Italisë si në Kalabri, Campagna, Emilia Romagna, Toscana, Lombardi, Veneto, Piemonte etj, ku ‘Ndragheta’ ka zonat e saj të influencës.
Disa të dyshuar janë lokalizuar dhe arrestuar në Gjermani, Zvicër dhe Bullgari në bashkëpunim me forcat e policisë lokale dhe në ekzekutimin e një urdhri arresti evropian lëshuar nga autoriteti gjyqësor i Catanzaros.
Policia Italiane ka deklaruar se operacioni është ndër më të mëdhenjtë e zhvilluar në territorin Italian por ndërkohë nuk ka dhënë detaje më të hollësishme veç faktit se operacioni kishte si qëllim identifikimin dhe sekuestrimin e pasurive të klanit mafioz ‘Ndrangheta’.
