Kancelarja gjermane Angela Merkel pranoi sot të metat në reagimin e Gjermanisë ndaj valës së dytë të COVID-19, gjatë një fjalimi në parlament. “Gjermania e kaloi valën e parë të rasteve, në fillim të pandemisë, relativisht mire”, u tha Merkel deputetëve.
“Atëherë nuk qemë mjaft të kujdesshëm ose mjaft të shpejtë”, vazhdoi ajo, duke shtuar se bllokimi i dytë, që është forcuar gradualisht që nga nëntori, nuk u vendos aq shpejt sa duhet. Të mërkurën, Merkel dhe 16 kryeministrat shtetërorë të vendit ranë dakord të zgjasin gjerësisht masat e bllokimit përtej mesit të këtij muaji, deri më 7 mars.
Zyrtarët qeveritarë dhe ekspertët kanë paralajmëruar në mënyrë të përsëritur se numri i rasteve nuk është ende mjaft i ulët për të rihapur gjerësisht shoqërinë dhe kanë theksuar rrezikun që paraqesin variantet më infektive të COVID-19, veçanërisht mutacioni i shfaqur fillimisht në Britaninë e Madhe, që është përhapur në Gjermani. Në fjalimin e saj në Bundestag, Merkel tha se vendi duhet të marrë parasysh paralajmërimet e shkencëtarëve.
