Materniteti i Sarandës i lënë në harresë për vite me radhë e me kushte aspak dinjitoze për stafin mjekësor dhe pacientët është transformuar rrënjësisht.Kryeministri Edi Rama publikoi sot një fotogaleri nga ky maternitet para dhe pas investimit, ku duket qartë transformimi që ka pësuar, ndërsa thekson se në shëndetësi ka ende punë për tu bërë.
“Materniteti i Sarandës si e gjetëm dhe si është sot. Patjetër ka ende shumë më shumë për të bërë për shërbimin shëndetësor, në çdo aspekt, kjo s’ka asnjë diskutim! Por ama këdo që e ka harruar si ishte shëndetësia dhe shan, akuzon, përqesh, a thua se ka ardhur nga hëna e nuk i kanë parë stallat e deri para 7 vjetëve që quheshin spitale, duhet ta ndihmojmë të zgjojë kujtesën nga gjumi”, thekson Rama.
Kreu i qeverisë u shpreh se, “të na kishte zënë Covidi me ato stalla “spitalore” që gjetëm para 7 vjetësh, sot do jetonim një qamet më të madh se vetë lufta”. Materniteti i ri i Sarandës është një investim i buxhetit të shtetit me vlerë 336 milionë lekë, i cili u shërben 140 mijë qytetarëve të 4 bashkive: Sarandë, Konispol, Delvinë dhe Finiq.
