Presidenti Ilir Meta ka dekoruar organizatën e veteranëve të Luftës Antifashiste Nacionalçlirimtare, me rastin e 75-vjetorit të çlirimit të Shqipërisë. “Në kuadër të 75-vjetorit të çlirimit të atdheut, pata sot nderin e veçantë t’i dorëzoj dekoratën e lartë “Nderi i Kombit”, organizatës së veteranëve të Luftës Antifashiste Nacionalçlirimtare, për kontributin e përhershëm që ka dhënë e jep në mbrojtje të idealit të luftës për liri dhe dinjitet kombëtar”, -tha Presidenti. Meta ka theksuar se “edukimi i gjeneratave të reja me ndjenjat e atdhedashurisë dhe patriotizmit është sfidë e rëndësishme për të ardhmen. Luftës Antifashiste Nacionalçlirimtare e vendosi Shqipërinë në anën e duhur të historisë! Lavdi përjetë dëshmorëve dhe heronjve të Atdheut”.
