Kanë dalë dje para gjykatës shokët e Mehmet Qemës, 27 vjeçari i cili humbi jetën pak ditë më parë.
Në mes tyre është edhe ai që i mori jetën pasi luajti “ruletën ruse”, Marjus Dema.
Marjus Dema shihet që nuk e ngre aspak kokën drejt kamerave ndërsa një prej shokëve të tjerë, Blerim Hoti dallohet më i qetë.
Ai mban një qëndrim më të ftohtë dhe nuk i dridhet as qerpiku. Një tjetër djalë shfaqet në shok dhe bën lëvizje të pavullnetshme që ngjasojnë si dridhje.
Ndërkohë pronari i një servisi në Tiranë ka rrëfyer skenën që ka parë pas ngjarjes në rrugën “5 maji”. OraNews shkruan se pronari i servisit ka deklaruar para grupit hetimor se është lajmëruar nga një tjetër person dhe ka shkuar pranë ‘shtëpisë së bardhë’ ku ndodhej dhe lokali ku humbi jeten Qema. Ai shton se ka parë autorin Marjus Demën që të shtrihej në tokë duke qarë.
“Më mori dikush në telefon dhe më tha. Sapo kisha dalë dhe pashë disa djem që largoheshin në drejtime të ndryshme. Marjusi ishte shtrirë dhe po qante e bërtiste po fliste përcart, fillimisht mendova mos ishte plagosur ky. E kishte kapur në krahë por fliste përçart “O çfarë bëra, më vde ktë goca” dhe fliste në telefon. Kishin dalë dhe banorë të lagjes pasi ishte krijuar një situatë alarmante,”- tregon pronari i servisit.
